الأربعاء، 1 أكتوبر 2014

[zmn1.com] قصيدة من غزة "تعرف شو يعنى القهر"

9:37 م  X5  


عروس تطلب الشهادة
من عريسها مهر!
تعرف شو يعني القهر
حامل في تسع شهور
تولد الصبح
يستشهد ابنها الظهر!
تعرف شو يعني القهر
بايع بلده بالسر
لكن بطل بالجهر!
تعرف شو يعني القهر
عمره خمس سنين
وبيقول لك انقلب من الغربة جمر!
تعرف شو يعني القهر
سنتين رِجل عا رِجِل ( يعني يجلس بلا عمل)
وبيسألك وين النصر؟
تعرف شو يعني القهر
الصبح عريس
ولَفُّوه شهيد العصر!
تعرف شو يعني القهر
طفل راح ع مدرسته
وما رجع من 12 شهر!
تعرف شو يعني القهر
عجوز بالمقبرة ضايعة
ما بتعرف ابنها بأي قبر!
تعرف شو يعني القهر
يحتفلوا ويرقصو
ودمّنا ماشي تحتهم نهر!
تعرف شو يعني القهر
إشراف تنام بالمخيمات
وكلاب تنام بالقصر
تعرف شو يعني القهر
انك تكون مسلم
وعم يتهموك بالكفر!
تعرف شو يعني القهر
انك تكون مصاب
ويتخلى عنك كل الناس
حتى القبر!
تعرف شو يعني القهر
بلد كامل وما فيه
غير ريحة الموت عطر!!
تعرف شو يعني القهر
انك تكون صاحب حق
وكل الناس تنساك
وما ينساك رب البشر!!
تعرف شو يعني القهر
انك تترك بلدك
وتفكر حالك راجع بعد شهر!!!!
تعرف شو يعني القهر
هذا هو القهر
هذا هو القهر
 هذا هو القهر